తరాలు మారినా - తలరాతలు మారెనా?

తరాలు మారినా - తలరాతలు మారెనా? |ఫణీంద్ర కుప్పిలి

తరాలు మారినా..
ఏపిపియస్సీ తీరు మారెనా??
అభ్యర్థుల తల రాతలు మారెనా??

ఒక సమున్నతమైన లక్ష్యాన్ని ఏర్పర్చుకుని
ఆ లక్ష్య సాధన కోసం
అనుక్షణం పరితపిస్తూ
కన్నవారిని కట్టుకున్న భార్యని
చివరికి కన్న బిడ్డల్ని సైతం..
వారి సుఖ సంతోషాల్ని దూరం చేసినా
మౌనంగా భరించారు, సహించారు
ఎందుకంటే
నేనేదో గొప్ప ఆఫీసర్నయి
అందర్నీ ఉద్ధరిస్తానని...

కోటి ఆశలతో
లక్ష్యాన్నే శ్వాస గా
రేయింబవల్ని
ఏకం చేస్తూ పంచవర్ష ప్రణాళిక లా
అడుగడుగునా అవాంతరాలను
అనేకానేక వాయిదాల్ని దాటి
చివరి అంకాన్ని పూర్తి చేస్కుని
వెన్నెల కోసం ఎదురు చూసే చకోరం లా
ఫలితాల కోసం
ఎదురు చూసిన మాకు
చివరికి నిరాశే మిగిలింది..

ఎవరో చేసిన పాపాపాలకు
నిర్దాక్షిణ్యం గా బలిచేస్తూ
మమ్మల్ని అథపాతాళం లోకి
నెట్టేశారు నిర్దయగా..

లెక్కలేన్ని తప్పులు చేసినోళ్లు దర్జా వెలగబెడుతూంటే
ఏ తప్పు లేని వారు బలి పశువులవుతున్నారు..
విలువైన ధనాన్ని, కాలాన్ని
అన్నిటికీ మించి ఆత్మ గౌరవాన్ని కోల్పోయి
జీవచ్చవాల్లా తిరుగుతున్నా
పలుకరించే నాధుడే లేడు..

ఇది కేవలం మా వ్యధ మాత్రమే కాదు
ఉద్యోగాల కోసం ఎదురుచూసి
దగాపడ్తున్నా లక్షలాది
నిరుద్యోగుల మానసిక సంఘర్షణ..

మన తండ్రుల కాలం నుండీ
మన పిల్లల కాలం వరకు
ఎన్ని తరాలు మారినా
మన తలరాతలు మారెనా?
ఏపిపియస్సీ తీరు మారెనా??