ఒంటరితనం | ఫణీంద్ర కుప్పిలి
ఒంటరితనం | ఫణీంద్ర కుప్పిలి
చుట్టూ జనసందోహం ఉన్నా, నువ్వు లేకపోవడం..
పెద్ద గది నవ్వులతో నిండి ఉన్నా...
ఆ నవ్వులో ఒక్కటి కూడా నీకోసం కాదని,
నీకు చేరని నిశ్శబ్దమని తెలిసిపోవడం.
నూరుగురు కళ్లలో చూసినా... నీకు దక్కని ఆ ఒక్క జత చూపు.
నీ పేరు పలికినా... ఏ గుండెలోనూ రాతిపలక కదలకపోవడం
ఒంటరితనం అంటే...
మరణం తర్వాత కాదు...
బ్రతికి ఉండగానే... ఎవరికీ గుర్తుండని నిర్జీవ స్థితి.
అది అలికిడి చేయదు... ఆకారం లేదు.
కానీ ప్రతి రాత్రి... గుండెలో ఒక సూక్ష్మ రంధ్రం వేసి...
మెల్లగా... నిస్సత్తువగా...
నిన్ను నీలోంచి ఖాళీ చేసేస్తుంది..
22.11.2025